Monday, May 27, 2019
ધાર્મિક

આ મંદિર આવેલું છે દીવથી ફક્ત 3 જ કિમી દૂર, અહીંયા સ્વયં શિવજી કરે છે અભિષેક !!!

5Views

જયારે પણ આપણે દીવ જઇયે એટલે ત્યાંનો દરિયો અને મોજ-મસ્તીની પહેલા જ યાદ આવે. દીવમાં ફરવા જેવી ઘણી જ જગ્યાઓ છે અને મોટેભાગે લોકો આ બધી જ જગ્યાએ તો જતા જ હોય છે જેમ કે દીવના બીચ, કિલ્લા અને ચર્ચ. તમે તમારા ફ્રેંડ્સ જોડે અને ફેમિલી જોડે દીવ ચોક્કસથી ગયા જ હશો પરંતુ કોઈ દિવસ તમને દીવમાં મંદિર જવાનો વિચાર આવ્યો છે ? કદાચ જ આવ્યો હશે! પણ શું તમને ખબર છે કે દીવમાં એક શંકર ભગવાનનું મંદિર આવેલું છે ? સમુદ્રના મોજાં આખો દિવસ આ મંદિરના શિવલિંગ પર જળાભિષેક કરે છે.

ગંગેશ્વર મંદિર


આ મંદિર દીવથી 3 કિલોમીટરના અંતરે આવેલું છે અને ગંગેશ્વર મંદિર દીવના ફુદમ ગામમાં આવેલું છે. આ મંદિર શંકર ભગવાનને સમર્પિત છે અને આ મંદિર દરિયા કિનારે આવેલું છે. આ મંદિરમાં કુલ 5 શિવલિંગ છે. અને આ શિવલિંગ પર દરિયાદેવ સ્વયં જ જળાભિષેક કરે છે. આ મંદિર નાનકડી ગુફામાં છે અને અહીંયા સાચે જ ભક્તિનો સાગર વહે છે. તમે જેવો આ મંદિરમાં પગ મુકો છો તો તમને એકદમ આહ્લાદક અનુભવ મળે છે. તમે જેવા આ મંદિરમાં પ્રવેશ કરો એટલે એવો જ અનુભવ થાય કે જાણે સમુદ્ર જાતે જ તમારા માટે શિવલિંગ પર જળાભિષેક કરીને તેને એકદમ સ્વચ્છ કરે છે. જેવા શિવલિંગ પર તમે પુષ્પો અને બિલિપત્રો અર્પણ કરો છો એટલે તરત જ બીજું મોજું આવે છે અને બધું જ પોતાની સાથે વહાવીને લઇ જાય છે.

આ શિવલિંગની સ્થાપના કરી હતી પાંચ પાંડવોએ


એક બાજુ આ મંદિરમાં તમે ભક્તિમાં લીન થઇ જાઓ છો અને બીજી બાજુ દરિયો તમને પલાળી પણ દે છે. પણ સાચે જ આ અનુભવ ઘણો જ સુખદ લાગે છે. પૌરાણિક માન્યતા એવી છે કે આ મંદિરમાં જે પાંચ શિવલિંગ છે એની પૂજા પાંડવો કરતા હતા. જો શિવલિંગના આકાર વિષે વાત કરીયે તો નાનાથી મોટો એમ પાંચેય પાંડવોની ઉંમર પ્રમાણે છે મતલબ કે પાંડવોમાં જે સૌથી મોટા ભાઈ યુધિષ્ઠિર છે તો એમનું શિવલિંગ સૌથી મોટું અને સૌથી નાના ભાઈ સહદેવ છે તેઓ એમનું શિવલિંગ સૌથી નાનું છે. એવું કહેવામાં આવે છે કે જયારે પાંડવો વનવાસે ગયા હતા તો એ સમયે એમણે આ જગ્યાએ શિવલિંગોની સ્થાપના કરી હતી.

મંદિરની આસપાસનું વાતાવરણ છે આહલાદક


જો ગંગેશ્વર મંદિરની સુંદરતા અને વાતાવરણનું શબ્દોમાં વર્ણન કરવું હોય તો એ થોડું અઘરું છે કારણકે ત્યાં જાતે જે અનુભવ લેવાની મજા છે તે કંઈક અનેરી જ છે. જયારે ગંગેશ્વર મંદિરમાં એન્ટર થાઓ છો તો તમને ત્યાંથી બહાર નીકળવાનું મન જ નહિ થાય એવું એનું વાતાવરણ છે. અહીંયાનો ઘૂઘવતો દરિયો પક્ષીઓનો કલરવ અને હવાની લહેરખીથી મન પ્રફુલ્લિત થઇ જશે. અહીંયા તમને ભક્તિ અને કુદરતી સૌંદર્ય બંનેનો સુગમ સમન્વય દેખાશે.તો જો તમે આ મંદિરે હજી સુધી ગયા નથી તો તમે દીવ જવાના હોવ તો તમારા લિસ્ટમાં ઉમેરી દેજો. અને જયારે પણ દીવ જાઓ તો આ મંદિરે દર્શન કર્યા વગર પાછા આવતા નહિ.