ઉદયપુર અમદાવાદથી ફક્ત 260 જ કિલોમીટર દૂર આવેલું છે અને અત્યારે ગુજરાતીઓ માટે આ ફેવરિટ હોલિડે ડેસ્ટિનેશન છે. આ જગ્યાએ ફક્ત 5 જ કલાકમાં પહોંચી જવાય છે માટે ગુજરાતીઓ આ જગ્યાએ અવારનવાર તળાવોના શહેર એટલે કે લેક સિટી ઉદયપુરની મુલાકાત લેવા જાય છે. ઉદયપુર ડુંગરની વચ્ચે તળાવોની આજુબાજુ આવેલું છે અને અહીંયા રાજસ્થાની સંસ્કૃતિની સાથે સાથે કુદરતી સૌંદર્યને માણી શકાય છે. એના લીધે જ આ જગ્યાની મુલાકાત માટે બારેમહિના પ્રવાસીઓ આવતા હોય છે. ખાસ તો અત્યારે પ્રિવેડિંગ ફોટો શૂટ અને ડેસ્ટિનેશન વેડિંગ માટે પણ લોકોમાં ઉદયપુર ખુબજ ફેવરિટ બન્યું છે.

ઉદયપુરમાં ફરવાની જગ્યાઓ


મોટેભાગે જે પણ પ્રવાસીઓ ઉદયપુર જાય છે તો સિટી પેલેસ, સહેલીઓ કી બાડી, ગનગોર ઘાટ, પિચોલા તળાવ, ફતેહ સાગર તળાવ, જગદીશ મંદિર, સજ્જન ગઢ જેવા વધુ જાણીતા એવા ટૂરિસ્ટ ડેસ્ટિનેશન પર જતા હોય છે. પણ ઉદયપુરમાં એક જગ્યા એવી છે જે જેના વિષે ઘણા ઓછા પ્રવાસીઓને ખબર હોય છે. જો આ જગ્યાની વાત કરીયે તો આ જગ્યા ઘણી જ સુંદર છે અને જો તમે એકવાર ત્યાં જશો તો પછી કોઈ દિવસ આ જગ્યાએ જવાનું ભૂલશો નહિ. જો તમે અત્યાર સુધી આ જગ્યાએ ગયા નથી તો તમે ઉદયપુરની સાચી સુંદરતાનો અનુભવ જ નથી કર્યો એવું કહીયે તો ખોટું ના કહેવાય.

બડી લેક


બડી લેક ઉદયપુરમાં આવેલા સૌથી મોટા તળાવ ફતેહસાગરથી દસેક કિલોમીટર દૂર આવેલું છે. આ સુંદર તળાવ પર્વતોની વચ્ચે છે અને અહીંયા પ્રવાસીઓ માટે પાર્ક બનાવવામાં આવેલો છે. તમે અહીંયા ઝરૂખામાં બેસીને ઘણા કલાકો સુધી આ જગ્યાના સૌંદર્યની મજા માણી શકો છો. આ જગ્યા વિષે પ્રવાસીઓ વધુ જાણતા નથી માટે આ ભીડભાડથી દૂર આવેલી જગ્યાએ તમે પ્રકૃતિના સાંનિધ્યમાં તમારો ક્વોલિટી સમય પસાર કરી શકો છો. અહીંયા ખાસ તો વહેલી સવારે કે ઢળતી સાંજે તમે જાઓ તો ત્યા સૂર્યોદય કે સૂર્યાસ્ત જોવાની મજા ઘણી આહલાદક છે.

બડી લેક બંધાયું હતું પ્રજા વત્સલ રાજાએ


ઉદયપુરથી આશરે 12 કિલોમીટર દૂર બડી ગામમાં મહારાણા રાજ સિંહ પહેલાએ (1652-1680) આ તળાવને બંધાવ્યું હતું. આ લેક બંધાવવાની પાછળ એક હેતુ એ હતો કે  તેની પ્રજાને દુકાળથી બચાવી શકાય. આ તળાવનું નામ રાજાની માતા જ્ઞાન દેવીના નામ પરથી જ્ઞાન સાગર પડાયું હતું. આ તળાવ 155 ચો. કિ.મીના વિસ્તારમાં વિસ્તરિત છે. આ લેકના કિનારે કળાકૃતિવાળી છત્રીઓ કે ઝરૂખાને બનાવાયા છે. અહીંયા 1973માં દુકાળ પડ્યો હતો ત્યારે આ તળાવથી ઉદયપુરના લોકોનો જીવ બચાવ્યો હતો. આ જગ્યાએ વધારે કોઈ બાંધકામ નથી થયું હોવાથી માટે કુદરતી સુંદરતાને ખુબજ મન ભરીને માણી શકાય છે.

અહીંયા પહાડ પર પણ ચડી શકાય છે


જો તમે બડી લેકના રસ્તે થોડા આગળ જાઓ છો તો પહાડો પર ટ્રેકિંગની મજા પણ લઇ શકાય છે. આ પહાડની બંને બાજુ તળાવ વિસ્તરેલું છે. અને પહાડના શિખર ઉપરથી જોવામાં આવે તો આ નજારો ખરેખર સ્વર્ગ સમાન લાગે છે. જો કોઈને એડવેન્ચર ગમે છે અને કોઈ વ્યક્તિ કુદરતપ્રેમી છે તો જયારે પણ ઉદયપુર જાવ તો આ જગ્યાએ જવાનું ભૂલતા નહિ. અને આ અનુભવને તમે તમારી આખી જિંદગી રાખશો.